pachhta rahe hain dard ke rishton ko toD kar
sar phoDte hain apne hi diwar-o-dar se log
patthar uchhaal uchhaal ke marham ke nam par
karte rahe mazaq mere zaKHm mere log
kab TuTe dekhiye mere KHwabon ka silsila
ab to gharon ko lauT rahe hain safar se log
sailab jang zalzale tufan aandhiyan
sunte rahe kahaniyan buDhe shajar se log
kya KHub shohraton ki hawas hai KHud apne nam
likhne lage kitabon mein ab aab-e-zar se log
Ghazal
Pachhta rahe hain dard ke rishton ko toD kar
Aftab Arif