nind aankhon mein rahe phir bhi na soya jae
main wo patthar hun ki roun to na roya jae
ajnabi hai tere KHush-rang badan ki KHushbu
ek zara lams-e-wafa tujh mein samoya jae
shab ke sahra ne ajab pyas likhi hai mujh mein
mujh ko KHurshed ke shoalon mein Duboya jae
main ne tanhai mein jal kar bhi yahi chaha hai
KHushbuon se tere aanchal ko bhigoya jae
zindagi ko hai zarurat nae pairahan ki
apne hi KHun mein apne ko Duboya jae
Ghazal
Nind aankhon mein rahe phir bhi na soya jae
Jazib Quraishi