nazar-nawaz nazaron mein ji nahin lagta
wo kya gae ki bahaaron mein ji nahin lagta
shab-e-firaq ko ai chand aa ke chamka de
nazar udas hai taron mein ji nahin lagta
gham-e-hayat ke mare to hum bhi hain lekin
gham-e-hayat ke maron mein ji nahin lagta
na puchh mujh se tere gham mein kya guzarti hai
yahi kahunga hazaron mein ji nahin lagta
kuchh is qadar hai gham-e-zindagi se dil mayus
KHizan gai to bahaaron mein ji nahin lagta
fasana-e-shab-e-gham KHatm hone wala hai
'shakil' chand sitaron mein ji nahin lagta
Ghazal
Nazar-nawaz nazaron mein ji nahin lagta
Shakeel Badayuni