Nazar ko tir kar ke raushni ko dekhne ka

nazar ko tir kar ke raushni ko dekhne ka
saliqa hai hamein bhi zindagi ko dekhne ka

kisi jalte hue lamhe pe apne honT rakh do
agar hai shauq jamid KHamushi ko dekhne ka

samaat mein khanakti raushni se ho gaya hai
do-baala lutf miTTi ki nami ko dekhne ka

na jaane lauT kar kab aaega mausam KHajista
teri aankhon ki shaista hansi ko dekhne ka

suna hai shauq tha un ko hunar aata nahin tha
sunahre zehn ki waraftagi ko dekhne ka

yaqin aata nahin lekin mila tha ek mauqa
shagufta shahr ki be-manzari ko dekhne ka

baDa arman tha 'sajid' tumhein kya Dar gae kya
shab-e-taban hawa ki KHud-kushi ko dekhne ka