nazar KHamosh hui arz-e-na-tamam ke baad
kuchh aur kah na sake ashk-e-be-kalam ke baad
ye mughbache tere saqi abhi hain KHira bahut
har ek jam-e-tahi aur sala-e-am ke baad
bas itni baat ke kya kya hain bazm mein charche
wo muskura se diye the mere salam ke baad
namaz-e-jam paDhi shaiKH ne nahin lekin
ajab sa nur hai ruKH par tulu-e-sham ke baad
har ek nazaa ka hal intiqam hi hai abhi
magar sawal to ye hai ki intiqam ke baad
ye lag raha hai ki jaise bichhaD rahi hai hayat
palaT palaT ke nigahen hain gam gam ke baad
kisi mahal kisi wadi kisi chaman mein nahin
wo gul jo dil mein mahakta hai nek kaam ke baad
ghurur-e-tishna-saqi bhi hai koi shai saqi
taqaza hum nahin karne ke jam jam ke baad
ye sach nahin ki mere dil mein aur nam nahin
magar ye sach hai ki ye sab hain tere nam ke baad
hai zist zist usi ki ki jis ke bazu ko
uruh-e-subh bhi DhunDe nigar-e-sham ke baad
badalti qadron mein kuchh hun ki kuchh nahin 'mulla'
sawaliya sa nishan hun KHud apne nam ke baad
Ghazal
Nazar KHamosh hui arz-e-na-tamam ke baad
Anand Narayan Mulla