nazar chura gae izhaar-e-muddaa se mere
tamam lafz jo lagte the aashna se mere
rafiqo rah ke KHam subh kuchh hain sham kuchh aur
milegi tum ko na manzil nuqush-e-pa se mere
lagi hai chashm-e-zamana agarche wo daman
bahut hai dur abhi dast-e-na-rasa se mere
yahin kahin wo haqiqat na kyun talash karun
jise gurez hai auham-e-ma-wara se mere
kisi pe minnat-e-beja nahin ki sach ye hai
sanwar gae dil o jaan shewa-e-wafa se mere
giran hain kan pe un ke wahi suKHan jo abhi
ada hue bhi nahin nutq-e-be-nawa se mere
khula chaman na hawa mein phir ai naqib-e-bahaar
abhi to zaKHm hare hain teri dua se mere
nashat o rang ke KHugar mujhe muaf rakhen
chhalak paDe jo lahu saz-e-KHush-nawa se mere
Ghazal
Nazar chura gae izhaar-e-muddaa se mere
Shaanul Haq Haqqi