Narghe mein ghaTaon ke raha hai na rahega

narghe mein ghaTaon ke raha hai na rahega
KHurshed mohabbat ka chhupa hai na chhupega

ho jate hain nakaam KHirad-mandon ke fitne
sar-e-ahl-e-junun ka na jhuka hai na jhukega

tum kyun ho pareshan ki taqdir ka likkha
duniya ke miTane se miTa hai na miTega

tarkash se takabbur ke jo itra ke chala hai
wo tir nishane pe laga hai na lagega

talim-o-hunar hi wo KHazana hai jo ab tak
daulat ke luTeron se luTa hai na luTega

ho jata hai fauran jo pasheman KHata par
nazron se azizon ki gira hai na girega

mansab jahan zalim ke asar mein ho wahan par
mazlum ko insaf mila hai na milega

hajat se ziyaada ki talab sab ko hai 'talib'
qismat se siwa phir bhi mila hai na milega