nahin malum ye kya kar chuke hain
hum apne dil se dhoka kar chuke hain
zara kar-e-jahan bhi kar ke dekhen
bahut kar-e-tamanna kar chuke hain
koi patthar hi aae ab kahin se
hum apne dil ko shisha kar chuke hain
zamana hai bure ham-sae jaisa
so ham-sae se jhagDa kar chuke hain
sameTega koi kaise jo patte
bikharne ka tahayya kar chuke hain
bahut shaffaf tha baadal ka daman
jise hum log maila kar chuke hain
wo dil jis ne hamein ruswa kiya tha
hum aaj us dil ko ruswa kar chuke hain
Ghazal
Nahin malum ye kya kar chuke hain
Inam Nadeem