Nae mausam ki bashaarat hain hum

nae mausam ki bashaarat hain hum
bazm-e-imkan ki zinat hain hum

hum se kya aankh milaen mah-o-mahr
zarra-e-KHak ki azmat hain hum

hum se sairab hawa qarya-e-husn
chashm-e-be-tab ki fitrat hain hum

apna kya hai ki rahe ya na rahe
han magar teri zarurat hain hum

dastaras mein hai jahan-e-sahra
ahl-e-dil ahl-e-mohabbat hain hum

dhyan mein rahta hai wo mushaf-e-gul
har ghaDi mahw-e-ibaadat hain hum