naz-parwarda-e-jahan tum ho
dard-o-gham ho jahan jahan tum ho
ye zamin bhi agar nahin meri
hae kyun zer-e-asman tum ho
main ne ki thi shikayat-e-darun
be-sabab mujh se bad-guman tum ho
main zamane se KHud samajh leta
waqt ke mere darmiyan tum ho
phuTti hai wahin se dard ki lai
parda-e-saz mein jahan tum ho
tum ko pa kar bhi sochta hun yahi
kya faqat ranj-e-raegan tum ho
Ghazal
Naz-parwarda-e-jahan tum ho
Sulaiman Areeb