na puchh us ki jo apne andar chhupa
ghanimat ki main apne bahar chhupa
mujhe yan kisi pe bharosa nahin
main apni nigahon se chhup kar chhupa
pahunch muKHbiron ki suKHan tak kahan
so main apne honTon pe aksar chhupa
meri sun na rakh apne pahlu mein dil
ise tu kisi aur ke ghar chhupa
yahan tere andar nahin meri KHair
meri jaan mujhe mere andar chhupa
KHayalon ki aamad mein ye KHarzar
hai tiron ki yalghaar tu sar chhupa
Ghazal
Na puchh uski jo apne andar chhupa
Jaun Eliya