na-jaane kaun tere kaKH-o-ku mein aaega
jo aaega wo meri aarzu mein aaega
main jaanta hun mere baad mere marqad par
koi ghubar meri justuju mein aaega
yahi to soch ke jalte hain masjidon ke charagh
darun-e-shab yahan koi wazu mein aaega
tere KHayal ki lau se chamak uThe hain huruf
abhi to tu mere harf-e-numu mein aaega
mujhe KHuda se zara ham-kalam hone do
tumhaara zikr bhi is guftugu mein aaega
Ghazal
Na-jaane kaun tere kaKH-o-ku mein aaega
Iliyas Babar Aawan