Na itna kije talabgar kaun aap ka hai

na itna kije talabgar kaun aap ka hai
ye ghair hai to yahan yar kaun aap ka hai

na naz kijiye warasta-KHatiron ke sath
kidhar hain aap KHaridar kaun aap ka hai

masiha apna hai ek aur hi lab-e-jaan-baKHsh
KHuda ke fazl se bimar kaun aap ka hai

hum apni be-gunahi ko gunah kahte the
bigaD gae ye gunahgar kaun aap ka hai

tasawwur aur hi badmast ka hai 'lutf' ko ab
na aap bahkiye sarshaar kaun aap ka hai