Na baaten kin na taskin di na pahlu mein zara Thahre

na baaten kin na taskin di na pahlu mein zara Thahre
jo tum aae to kya aae jo tum Thahre to kya Thahre

kis ka rang-e-ulfat kya jame wan ye bhi mushkil hai
ki un ke dast o pa mein ek dam rang-e-hina Thahre

dil-e-muztar ba-shakl-e-barq dam lene nahin deta
mujhe aaram aa jae jo pahlu mein zara Thahre

wafadari hui be-kar marna khel aa Thahra
KHuda jaane ki ab kya rang-e-ain-e-wafa Thahre

dimagh aisa hi kuchh nazuk jalen aaise hi kuchh bad-go
kahun ek harf-e-matlab aur wan ek majra Thahre

chaman mein aag si pairahan-e-gul se bhaDak uTThi
fughan se ek dam to bulbul-e-atish-nawa Thahre

agar jaana hi Thahra hai to achchha dil bhi le jao
kisi pahlu kisi surat to jaan-e-mubtela Thahre

kabhi shad hi kabhi gham hai kabhi kuchh aur aalam hai
dil ek mehman-sara hai is mein 'raunaq' koi aa Thahre