na aae samne mere agar nahin aata
mujhe to us ke siwa kuchh nazar nahin aata
bala use bhi to kahte hain log aalam mein
ajab hai kis liye wo mere ghar nahin aata
wo mere samne tuba ko qad se map chuke
unhon ke nam-e-KHuda ta-kamar nahin aata
na be-KHatar raho mujh se ki dard-mandon ke
labon pe nala koi be-KHatar nahin aata
Dara diya hai kisi ne use magar 'arif'
mere KHarabe ki jaanib KHizar nahin aata
Ghazal
Na aae samne mere agar nahin aata
Zain-ul-Abideen Khan Arif