Musafir KHana-e-imkan mein bistar chhoD jate the

musafir KHana-e-imkan mein bistar chhoD jate the
wo hum the jo charaghon ko munawwar chhoD jate the

sabhi ko agle farsangon ki paimaish muqaddar thi
musafir tai-shuda milon ke patthar chhoD jate the

garajte-gunjte aate the jo sunsan sahra mein
wahi baadal ajab viran manzar chhoD jate the

na thin malum bhuki nasl ki majburiyan un ko
phaTi chadar wo talwaron ke upar chhoD jate the

nahin kuchh e'tibar ab qufl o darban ka kabhi hum bhi
paDosi ke bharose par khula ghar chhoD jate the

lahu par apne hi mauquf thi dharti ki zarKHezi
sabhi dahqan yahan kheton ko banjar chhoD jate the

kabhi aandhi ka KHadsha tha kabhi tufan ka andesha
wo registan le jate to sagar chhoD jate the