munh kis tarah se moD lun aise payam se
mujh ko bula raha hai wo KHud apne nam se
soe to sabz pair ka saya sarak gaya
Dera jama rakha tha baDe ehtimam se
kaise miTa sakega mujhe sail-e-ab-o-gil
nisbat hai mere naqsh ko naqsh-e-dawam se
go shahr-e-KHuftgan mein qayamat ka ran paDa
talwar phir bhi nikli na koi niyam se
haala bana raha hai tu ab un ke zikr ka
kab ke gae wo log salam-o-payam se
main to asir-e-garmi-e-bazar hun 'rashid'
mujh ko gharaz na jins se darham na dam se
Ghazal
Munh kis tarah se moD lun aise payam se
Rasheed Qaisrani