mujhe malal bhi us ki taraf se hota hai
magar ye haal bhi us ki taraf se hota hai
main TuTta bhi hun aur KHud hi juD bhi jata hun
ki ye kamal bhi us ki taraf se hota hai
pukarta bhi wahi hai mujhe safar ke liye
safar muhaal bhi us ki taraf se hota hai
jawab deta hai mere har ek sawal ka wo
magar sawal bhi us ki taraf se hota hai
wo mere haal se mujh ko hi be-KHabar kar de
ye ehtimal bhi us ki taraf se hota hai
main us ke hijr mein kyun TuT kar nahin roya
ye ek sawal bhi us ki taraf se hota hai
jab aagahi mujhe gumrah karti hai 'mohsin'
junun bahaal bhi us ki taraf se hota hai
Ghazal
Mujhe malal bhi uski taraf se hota hai
Mohsin Asrar