Mujhse kyun kahte ho mazmun ghair ki tahrir ka

mujh se kyun kahte ho mazmun ghair ki tahrir ka
jaanta hun muddaa main aap ki taqrir ka

sath gar sone na doge tum ko bhi nind aa chuki
main to aadi ho gaya hun nala-e-shab-gir ka

apne matlab ki samajh kar ho gae the hum to KHush
kyun mukarte ho yahi matlab hai us taqrir ka

ahd kis ka, aap jo kahte use sach jaanta
kya karun qail hun main to ghair ki tadbir ka

kuchh asar un par hua to kya hi dete hain fareb
kahte hain qail nahin main aah-e-be-tasir ka

ye to farmao ki kya us ko karunga main muaf
mere aage zikr kyun hai ghair ki taqsir ka

ek din sun kar chale aae the wo be-saKHta
aasman par hai dimagh ab aah-e-be-tasir ka

panja-e-ulfat se pakDa hai use dil ne mere
sahl hai qatil koi pahlu se khinchna tir ka

koshish-e-beja thi ye kuchh e'timad-e-aql par
ab ye darja hai ki qail hi nahin tadbir ka

jitne sar hain utne saude kya KHata naseh meri
main hi ek qaidi nahin us zulf-e-alam-gir ka

kya kaha tha main ne tum kya samjhe is ka kya ilaj
tum hi munsif ho ye matlab tha meri taqrir ka

ye mera likkha ki jo tadbir ki ulTi paDi
aur is par bhi mujhe shikwa nahin taqdir ka

jazb-e-ulfat is ko kahte hain kahin paD jae hath
zaKHm dil par hi pahunchta hai teri shamshir ka

mujh ko us ke pas jaana us mein jo kuchh ho 'nizam'
ek matlab jaanta hun zillat o tauqir ka