mujh se kahte ho kya kahenge aap
jo kahunga to kya sunenge aap
kya bayan-e-shab-e-firaq karen
na suna hai na ab sunenge aap
nahin khulta sabab tabassum ka
aaj kya koi bosa denge aap
naseha aap KHud hi nadan hain
kya nasihat mujhe karenge aap
dam-e-aKHir ye tha mere lab par
kis pe jaur-o-sitam karenge aap
zulm ki kuchh bhi intiha hogi
ya hamesha sitam karenge aap
muntazir hain tumhaare muddat se
dekhiye hum se kab milenge aap
dard na-gufta-ba ho jab saqi
wo sunen bhi to kya kahenge aap
Ghazal
Mujhse kahte ho kya kahenge aap
Pandit Jawahar Nath Saqi