Mujhko muaf kijiye rind-e-KHarab jaan ke

mujh ko muaf kijiye rind-e-KHarab jaan ke
aankhon pe honT rakh diye jam-e-sharab jaan ke

hashr mein ai KHuda na le mujh se hisab-e-KHair-o-shar
main ne to sab bhula diya raat ka KHwab jaan ke

waqt ne az-rah-e-karam baKHsha tha mujh ko taj-e-zar
main ne hi KHud jhaTak diya sar ka azab jaan ke

munsif-e-waqt aaKHirash tujh ko bhi chup si lag gai
mera sawal puchh ke un ka jawab jaan ke

aap ko gar na yaad ho apni jafaon ka shumar
dekhiye mujh ko ghaur se fard-e-hisab jaan ke

apni zaban se kis tarah qissa-e-gham bayan karun
paDhiye meri nigah ko dil ki kitab jaan ke

ye to na kahiye waqt-e-did sab thi KHata nasim ki
aap ne ru-e-naz pe Dali naqab jaan ke