Mujhko auron se koi shikwa nahin

mujh ko auron se koi shikwa nahin
main ne bhi to KHud ko pahchana nahin

sar pe aa pahuncha hai suraj karb ka
sath apne saya bhi apna nahin

shauq-e-manzil hi hai mera KHizr-e-rah
naqsh-e-pa har moD par milta nahin

ho gaya KHun-e-hayat ab yun safed
jaise mera is se kuchh rishta nahin

hai KHayal-e-KHam wo main ne jise
pairahan alfaz ka baKHsha nahin

ab hai chehron par naqab-e-maslahat
koi chehra dil ka aaina nahin

kyun na ho shoala-ba-daman zindagi
kis taraf ab aag ka dariya nahin

phul ki ek pankhuDi kahiye use
zindagi ek barg-e-awara nahin

zehn-e-'shibli' mein hai us ki gunj bhi
waqt ke honTon pe jo naghma nahin