mohabbat ki gawahi apne hone ki KHabar le ja
jidhar wo shaKHs rahta hai mujhe ai dil! udhar le ja
saji hai bazm-e-shabnam to tabassum kaam aaega
taaruf phul ka darpesh hai to chashm-e-tar le ja
andhere mein gaya wo raushni mein lauT aaega
diya jo dil mein jalta hai usi ko baam par le ja
uDanon aasmanon aashiyanon ke liye tair!
ye par TuTe hue mere ye meyar-e-nazar le ja
zamanon ko uDanen barq ko raftar deta tha
magar mujh se kaha Thahre hue sham-o-sahar le ja
koi munh pher leta hai to 'qasir' ab shikayat kya
tujhe kis ne kaha tha aaine ko toD kar le ja
Ghazal
Mohabbat ki gawahi apne hone ki KHabar le ja
Ghulam Mohammad Qasir