mohabbat KHabt hai ya waswasa hai
magar apni jagah ye waqia hai
jise hum wahima samjhe hue hain
wo saya bhi teri diwar ka hai
makan sargoshiyon se gunjte hain
andhera rauzanon se jhankta hai
dar o diwar chup sadhe hue hain
faqat ek aalam-e-hu bolta hai
meri aankhon pe ainak dusri hai
ki ye taswir ka ruKH dusra hai
suna hai Dubne wale ne pahle
kisi ka nam sahil par likha hai
guzar kis ka hua hai jo abhi tak
do-alam aaina-bardar sa hai
ye duniya miT gai hoti kabhi ki
magar ek nam aisa aa gaya hai
mohabbat hai 'rasa' meri ibaadat
ye mera dil mera dast-e-dua hai
Ghazal
Mohabbat KHabt hai ya waswasa hai
Rasa Chughtai