moajiza ye bhi dikhaya main ne
apne qatil ko rulaya main ne
KHud hi zaKHmon se sajaya dil ko
aur phir jashn manaya main ne
zist be-nur hui jati thi
phir lahu dil ka jalaya main ne
chand aur phul hi kya har shai mein
bas tera aks hi paya main ne
teri yaadon ko saja kar dil mein
ek sanam-KHana banaya main ne
shahr-e-ehsas tha wo KHud bhi 'nigar'
but-kada dil ka jo Dhaya main ne
Ghazal
Moajiza ye bhi dikhaya maine
Nigar Azeem