MiTTi tere mahakne se mujhko guman hai

miTTi tere mahakne se mujh ko guman hai
barish ki bund bund mein ek dastan hai

ye sochte ho kyun ki KHuda bas tumhein mila
dekho jahan zamin hai wahan aasman hai

lagta hai ghar wahi jahan aapas mein pyar ho
warna to log rahte hain aur ek makan hai

aankhon ki baat-chit mein paDna ye soch kar
nazron ke len-den mein dil ka ziyan hai

hairat hai kaise phul se KHushbu hui juda
mauqa mile to sochna kya darmiyan hai

shayad ki aur bhi kahin basti hai zindagi
lagta hai aur bhi kahin aisa jahan hai

tum hi kaho ki waqt se kyun haar man lun
jab ruh mein umang hai dil bhi jawan hai

'anwar' bazm hai saji ho jae shaeri
urdu se hum ko ishq hai apni zaban hai