MiTi miTi hui yaadon ke dagh kya jalte?

miTi miTi hui yaadon ke dagh kya jalte?
na thi sharab mein garmi ayagh kya jalte?

fasurda ho gae sehn-e-chaman ke parwane
mila na aatish-e-gul ka suragh kya jalte?

dabe dabe rahe sine main aarzu ke dagh
tumhaare husn ke aage charagh kya jalte?

bahaar mein bhi jigar-sozi-e-bahaar na thi
ye koh o dasht o chaman bagh-o-ragh kya jalte?

jalan bahut thi gham-e-zindagi ke shoalon mein
bahut fasurda the sahib-faragh kya jalte?

wafa se ahl-e-hawas ko surur kya milta?
KHirad-faroz the ye be-dimagh kya jalte?