mere Thahrao ko kuchh aur bhi wusat di jae
ab mujhe KHud se nikalne ki ijazat di jae
maut se mil len kisi gosha-e-tanhai mein
zindagi se jo kisi din hamein fursat di jae
be-KHad-o-KHal sa ek chehra liye phirta hun
chahta hun ki mujhe shakl-o-shabahat di jae
bhare bazar mein baiTha hun liye jins-e-wajud
shart ye hai ki meri KHak ki qimat di jae
bas ki duniya meri aankhon mein sama jaegi
koi din aur mere KHwab ko mohlat di jae
Ghazal
Mere Thahrao ko kuchh aur bhi wusat di jae
Salim Saleem