dil mein bhara za-bas-ki KHayal-e-sharab tha
manind aaine ke mere ghar mein aab tha
maujen kare hai bahr-e-jahan mein abhi to tu
jaanega baad-e-marg ki aalam habab tha
ugte the dast-e-bulbul-o-daman gul baham
sahn-e-chaman namuna-e-yaum-ul-hisab tha
Tuk dekh aankhen khol ke us dam ki hasraten
jis dam ye sujhegi ki ye aalam bhi KHwab tha
dil jo na tha to raat za-KHud-raftagi mein 'mir'
gah intizar o gah mujhe iztirab tha
Ghazal
Dil mein bhara za-bas-ki KHayal-e-sharab tha
Mir Taqi Mir