Hum hue tum hue ki mir hue

hum hue tum hue ki 'mir' hue
us ki zulfon ke sab asir hue

jin ki KHatir ki ustuKHwan-shikni
so hum un ke nishan-e-tir hue

nahin aate kaso ki aankhon mein
ho ke aashiq bahut haqir hue

aage ye be-adaiyan kab thin
in dinon tum bahut sharir hue

apne rote hi rote sahra ke
goshe goshe mein aab-gir hue

aisi hasti adam mein daKHil hai
nai jawan hum na tifl-e-shir hue

ek dam thi numud bud apni
ya safedi ki ya aKHir hue

yani manind-e-subh duniya mein
hum jo paida hue sau pir hue

mat mil ahl-e-duwal ke laDkon se
'mir'-ji un se mil faqir hue