Qayamat hain ye chaspan jame wale

qayamat hain ye chaspan jame wale
gulon ne jin ki KHatir KHirqe Dale

wo kala chor hai KHal-e-ruKH-e-yar
ki sau aankhon mein dil ho to chura le

nahin uThta dil-e-mahzun ka matam
KHuda hi is musibat se nikale

kahan tak dur baiThe baiThe kahiye
kabhu to pas hum ko bhi bula le

dila bazi na kar un gesuon se
nahin aasan khilane sanp kale

tapish ne dil jigar ki mar Dala
baghal mein dushman apne hum ne pale

na mahke bu-e-gul ai kash yak-chand
abhi zaKHm-e-jigar sare hain aale

kise qaid-e-qafas mein yaad gul ki
paDe hain ab to jine hi ke lale

sataya 'mir' gham-kash ko kinhon ne
ki phir ab arsh tak jate hain nale