Baghair dil ki ye qimat hai sare aalam ki

baghair dil ki ye qimat hai sare aalam ki
kaso se kaam nahin rakhti jins aadam ki

koi ho mahram shoKHi tera to mein puchhun
ki bazm-e-aish jahan kya samajh ke barham ki

hamein to bagh ki taklif se muaf rakho
ki sair-o-gasht nahin rasm ahl-e-matam ki

tanik to lutf se kuchh kah ki jaan-ba-lab hun main
rahi hai baat meri jaan ab koi dam ki

guzarne ko to kaj-o-wakaj apni guzre hai
jafa jo un ne bahut ki to kuchh wafa kam ki

ghire hain dard-o-alam mein firaq ke aise
ki subh-e-id bhi yan sham hai mahram ki

qafas mein 'mir' nahin josh dagh sine par
hawas nikali hai hum ne bhi gul ke mausam ki