Kar nala-kashi kab tain auqat guzaren

kar nala-kashi kab tain auqat guzaren
fariyaad karen kis se kahan ja ke pukaren

har-dam ka bigaDna to kuchh ab chhuTa hai in se
shayad kisi nakaam ka bhi kaam sanwaren

dil mein jo kabhu josh-e-gham uThta hai to ta-der
aankhon se chali jati hain dariya ki si dhaaren

kya zulm hai us KHuni-e-alam ki gali mein
jab hum gae do-chaar nai dekhen mazaren

jis ja ki KHas-o-KHar ke ab Dher lage hain
yan hum ne unhen aankhon se dekhen hain bahaaren

kyunkar ke rahe sharam meri shahr mein jab aah
namus kahan utren jo dariya pe izaren

we honT ki hai shor-e-masihai ka jin ki
dam lewen na do-chaar ko ta ji se na maren

manzur hai kab se sar-e-shorida ka dena
chaDh jae nazar koi to ye bojh utaren

baalin pe sar ek umr se hai dast-e-talab ka
jo hai so gada kis kane ja hath pasaren

un logon ke to gard na phir sab hain libasi
sau gaz bhi jo ye phaDen to ek gaz bhi na waren

na-chaar ho ruKHsat jo manga bheji to bola
main kya karun jo 'mir'-ji jate hain sudhaaren