Kya main bhi pareshani-e-KHatir se qarin tha

kya main bhi pareshani-e-KHatir se qarin tha
aankhen to kahin thin dil-e-gham-dida kahin tha

kis raat nazar ki hai soi chashmak-e-anjum
aankhon ke tale apne to wo mah-jabin tha

aaya to sahi wo koi dam ke liye lekin
honTon pe mere jab nafas baz-pasin tha

ab koft se hijran ki jahan tan pe rakha hath
jo dard-o-alam tha so kahe tu ki wahin tha

jaana nahin kuchh juz ghazal aa kar ke jahan mein
kal mere tasarruf mein yahi qita-e-zamin tha

nam aaj koi yan nahin leta hai unhon ka
jin logon ke kal mulk ye sab zer-e-nagin tha

masjid mein imam aaj hua aa ke wahan se
kal tak to yahi 'mir' KHarabaat-nashin tha