mile wo dars mujh ko zindagi se
ki ab Darne laga dil dosti se
KHirad hai aaKHiri manzil junun ki
pareshan kyun ho meri aagahi se
tum aae bhi to gham ko sath lae
mere aansu nikal aae KHushi se
KHud apna nam le kar kosta hun
KHudi ghafil nahin hai be-KHudi se
ye mana maut bhi aasan nahin hai
magar mushkil nahin hai zindagi se
zamana dars hasil kar raha hai
tumhaari aur hamari zindagi se
uchaTti si nazar 'iqbaal' un ki
koi milta ho jaise ajnabi se
Ghazal
Mile wo dars mujhko zindagi se
Iqbal Abidi