Mile mujhko gham se fursat to sunaun wo fasana

mile mujh ko gham se fursat to sunaun wo fasana
ki Tapak paDe nazar se mai-e-ishrat-e-shabana

yahi zindagi musibat yahi zindagi musarrat
yahi zindagi haqiqat yahi zindagi fasana

kabhi dard ki tamanna kabhi koshish-e-mudawa
kabhi bijliyon ki KHwahish kabhi fikr-e-ashiyana

mere qahqahon ki zad par kabhi gardishen jahan ki
mere aansuon ki rau mein kabhi talKHi-e-zamana

meri rifaton se larzan kabhi mehr-o-mah o anjum
meri pastiyon se KHaif kabhi auj-e-KHusrawana

kabhi main hun tujh se nalan kabhi mujh se tu pareshan
kabhi main tera hadaf hun kabhi tu mera nishana

jise pa saka na zahid jise chhu saka na sufi
wahi tar chheDta hai mera soz-e-shairana