Mile jo naqa-e-wahshat ko sarban koi

mile jo naqa-e-wahshat ko sarban koi
dikhaun qafila-e-KHwab ka nishan koi

KHamoshiyon hi se mashrut hai janam mera
so meri rakh se uThta nahin dhuan koi

KHasara aur hi hota tha be-ghari ka magar
mujhe makan mein rakhta hai be-makan koi

kisi se hone na hone ke darmiyan ho jo rabt
wahin to rabt mein aata hai darmiyan koi

suragh de ke mujhe meri be-zabani ka
mujhi mein aan basa mujh sa be-zaban koi

tu mere aks ko mizan-e-aina mein na tol
uTha raha hai abhi meri kirchiyan koi

tere KHayal ki aabaadiyan chhupati hun
ki mujh se chhin na le meri bastiyan koi