Mir-ji se agar iradat hai

'mir'-ji se agar iradat hai
qaul-e-'nasiKH' ki kya zarurat hai

kaun puchhe ye 'mir'-sahib se
in dinon kya junun ki surat hai

chand kis mah-jabin ka partaw hai
raat kis zulf ki hikayat hai

kya hawa-e-bahaar taza hai
kya charagh-e-sarae ibrat hai

zindagi kis shajar ka saya hai
maut kis dasht ki masafat hai

aag mein kya gul-e-maani hain
KHak mein kya numu ki surat hai

kya pas-e-parda-e-tawahhum hai
kya sar-e-parda-e-haqiqat hai

is kahani ka markazi kirdar
aadmi hai ki aadamiyyat hai

kaTta hun pahaD se din raat
masala ishq hai ki ujrat hai

phir mohabbat ka falsafa kya hai
ye agar sab lahu ki wahshat hai

ek to jaan-gusil hai tanhai
is pe ham-saegi qayamat hai

aur jaise use nahin malum
shahr mein kya hamari izzat hai

us ne kaise samajh liya ki mujhe
KHwab mein jagne ki aadat hai

ghar se shayad nikal paDe wo bhi
aaj kuchh dhup mein tamazat hai

hum yunhi mubtala se rahte hain
ya kisi aankh ki murawwat hai

'mir' bole suno 'rasa' mirza
ishq to aaj bhi sadaqat hai

is jahan-e-buland-o-past ke bich
kuchh agar hai to apna qamat hai