Mere KHush-aind-mustaqbil ka paighambar bhi tu

mere KHush-aind-mustaqbil ka paighambar bhi tu
meri barbaadi ka meri jaan pas-manzar bhi tu

tu ki fitrat ki tarah hai kis tarah tasKHir ho
yar KHush-manzar bhi tu ziddi bhi tu KHud-sar bhi tu

ek tazad-e-husn-e-mani hai teri tamir mein
dastaras mein bhi giraft-e-waqt se bahar bhi tu

tere chehre se ayan us ke na milne ka alam
KHush-nazar aata nahin us shaKHs se mil kar bhi tu

mere fan ki sari zebaish teri nisbat se hai
jo chhupa hai mere sheron mein wo danish-war bhi tu

ruh to pahle bhi thi ab ke badan bhi hai asir
ab to yun lagta hai jaise ho mera paikar bhi tu

tu hi sang-e-mil hai apne liye sultan-'rashk'
apne hi raste mein jo hail hai wo patthar bhi tu