mausam-e-gul tere inam abhi baqi hain
shahr mein aur gul-andam abhi baqi hain
aur khil ja ki maarif ki guzargahon mein
pech ai zulf-e-siyah-fam abhi baqi hain
ek subu aur ki lauh-e-dil-e-mai-noshan par
kuchh nuqush-e-sahar-o-sham abhi baqi hain
Thahar ai baad-e-sahar is gul-e-nau-rasta ke nam
aur bhi shauq ke paigham abhi baqi hain
uTTho ai shab ke ghazalo ki sahar se pahle
chand lamhat-e-KHush-anjam abhi baqi hain
intizar ai dil-o-dida ki hazaron asrar
sae ki tarah tah-e-jam abhi baqi hain
khol kar kijiye tashrih-e-sar-e-misra-e-zulf
is nawishte mein kuchh ibham abhi baqi hain
ai sahi-qad teri nisbat se sab unchi qadren
bawajud-e-rawish-e-am abhi baqi hain
hum mein kal ke na sahi 'hafiz'-o-'KHayyam' 'zafar'
aaj ke 'hafiz'-o-'KHayyam' abhi baqi hain
Ghazal
Mausam-e-gul tere inam abhi baqi hain
Sirajuddin Zafar