Mausam-e-gul hai tere surKH dahan ki had tak

mausam-e-gul hai tere surKH dahan ki had tak
ya mere zaKHmon se aarasta tan ki had tak

waqt har zaKHm ko bhar deta hai kuchh bhi kije
yaad rah jati hai halki si chubhan ki had tak

na kisi gul se talluq na kisi KHar se bair
rabt gulzar se hai bu-e-saman ki had tak

wo mujhe bhul nahin paya abhi tak yani
main use yaad hun mathe ki shikan ki had tak

baat ek aur pas-e-parda-e-alfaz bhi thi
us ne KHat mera paDha lutf-e-suKHan ki had tak

mahr-o-mahtab ki KHwahish se mujhe kya lena
mutmain dil hai jab ek sim-badan ki had tak

ye jo kahna hai ki har husn jafa-pesha hai
ek tohmat hai mere rashk-e-adn ki had tak