mausam-e-gham guzar na jae kahin
shab mein suraj nikal na aae kahin
apni tanhaiyan chhupane ko
but banae sanam girae kahin
wo sarapa hai KHwab KHushbu ka
jhonka jhonka bikhar na jae kahin
Dar ye kaisa hua safar mein mujhe
rasta KHatm ho na jae kahin
kya bataun wo kyun pareshan hai
mujh ko DhunDe kahin chhupae kahin
sab isi dhun mein bhage jate hain
koi aage nikal na jae kahin
baad muddat ke tu mila hai 'nizam'
Dar hai phir se bichhaD na jae kahin
Ghazal
Mausam-e-gham guzar na jae kahin
Sheen Kaaf Nizam