Mauj-dar-mauj nazar aata tha sailab mujhe

mauj-dar-mauj nazar aata tha sailab mujhe
panw Dala to ye dariya mila payab mujhe

but to duniya ne ba-har-gam tarashe lekin
sar jhukane ke na aae kabhi aadab mujhe

shiddat-e-karb se kumhla gae chehre ke KHutut
ab na pahchan sakenge mere ahbab mujhe

ek saya ki mujhe chain se sone bhi na de
ek aawaz ki karti rahe betab mujhe

jis ki KHwahish mein kisi baat ki KHwahish na rahe
aisi jannat ke dikhae na koi KHwab mujhe

wusaten daman-e-sahra ko bhi baKHshi hotin
tu ne baKHshi thi agar fitrat-e-simab mujhe