masrufiyat usi ki hai fursat usi ki hai
is sarzamin-e-dil pe hukumat usi ki hai
milta hai wo bhi tark-e-talluq ke bawajud
main kya karun ki mujh ko bhi aadat usi ki hai
jo umr us ke sath guzari usi ki thi
baqi jo bach gai hai masafat usi ki hai
hota hai har kisi pe usi ka guman mujhe
lagta hai har kisi mein shabahat usi ki hai
likkhun to us ke ishq ko likhna hai shairi
sochun to ye suKHan bhi inayat usi ki hai
dar-e-astan koi ho ba-zahir sar-e-sujud
lekin pas-e-sujud ibaadat usi ki hai
wo jis ke haq mein jhuTi gawahi bhi main ne di
'ruhi' mere KHilaf shahadat usi ki hai
Ghazal
Masrufiyat usi ki hai fursat usi ki hai
Rehana Roohi