Masale zer-e-nazar kitne the

masale zer-e-nazar kitne the
ahl-e-dil ahl-e-hunar kitne the

hashr aae to yahi faisla ho
kitne insan the bashar kitne the

kasa-e-chashm mein ummid liye
jo bhi the KHak-basar kitne the

sari basti mein makan the behad
jo khule rahte the dar kitne the

wo jo aasaishon mein tulte the
sang-e-marmar ke wo ghar kitne the

tujh ko paen tujhe kho baiThen phir
zindagi ek thi Dar kitne the

kitne dariya the kinare kitne
manzilen kitni safar kitne the

har taraf dhup ki yalghaaren thin
har taraf mom ke ghar kitne the

kitni aankhon ne gawahi di thi
dhup kitni thi shajar kitne the

kitne shab-KHun abhi tak mein hain
luT gae the jo nagar kitne the

waqt ki gard ye qadmon ke nishan
soch lo bar-e-digar kitne the

kachchi basti ke makin bhi gin lo
shahr mein sahab-e-zar kitne the