marna mariz-e-ishq ke haq mein shifa hua
achchha hua najat mili kya bura hua
rah-e-adam ki manzil-e-awwal mein kya hua
jo aaya KHak Dal ke mujh par hawa hua
nashtar ko Dubne na diya ai rag-e-junun
kya us ka ek qatra-e-KHun mein bhala hua
jis dil ke dagh se hamein thi chashm-e-raushni
rahta hai wo to sham hi se KHud bujha hua
bas aisi chaarasazi se ai 'shauq' baz aae
jis se ki dard aur bhi dil mein siwa hua
Ghazal
Marna mariz-e-ishq ke haq mein shifa hua
Pandit Jagmohan Nath Raina Shauq