mar kar bhi chhuTti nahin akasr lagi hui
hoti bahut bari hai muqarrar lagi hui
is shola-ru ko lag hai har dil se kya bujhe
hai sab gharon mein aag barabar lagi hui
dil ki KHabar jo aati hai har dam zaban par
rahti hai dam ki Dak barabar lagi hui
soz-e-darun ne phunk diya jism o jaan o dil
ek aag hai kaleja ke andar lagi hui
bhule hain zauq-e-mai se 'mazaq' apni jaan to kya
dil se hai yaad-e-saqi-e-kausar lagi hui
Ghazal
Mar kar bhi chhuTti nahin akasr lagi hui
Mazaq Badayuni