mar jaane ki us dil mein tamanna bhi nahin hai
andar se koi kahta hai jina bhi nahin hai
gul ho gain shamen zara tum jao hawao
shaKHon pe koi TuTne wala bhi nahin hai
ai sang sar-e-rah malamat se guzar ja
tera bhi nahin hai koi mera bhi nahin hai
ahbab ki chahat pe shubh bhi nahin hota
hum jaisa magar koi akela bhi nahin hai
tu chhoD gaya hai to koi gham na karenge
is daur mein insan KHuda ka bhi nahin hai
ye kya ki KHayalon se uDi jati hai KHushbu
main ne to abhi tak use socha bhi nahin hai
Ghazal
Mar jaane ki us dil mein tamanna bhi nahin hai
Shahzad Anjum Burhani