manzil ke KHwab dekhte hain panw kaT ke
kya sada-dil ye log hain ghar ke na ghaT ke
ab apne aansuon mein hain Dube hue tamam
aae the apne KHun ka dariya jo paT ke
shahr-e-wafa mein haqq-e-namak yun ada hua
mahfil mein hain lage hue paiwand TaT ke
khinchti thi jin ke KHauf se sadd-e-sikandari
soe nahin hain aaj wo diwar chaT ke
ab to darindagi ki nash bhi husn hai
diwar par sajate hain sar kaT kaT ke
Ghazal
Manzil ke KHwab dekhte hain panw kaT ke
Himayat Ali Shayar