main phul phul safar kar rahi thi KHwabon ka
phuwar lai thi tohfa nae gulabon ka
mile to qurb ka wo e'timad hi na raha
bhala tha us se to mausam wahi hijabon ka
wo zaKHm chun ke mere KHar mujh mein chhoD gaya
ki us ko shauq tha be-intiha gulabon ka
wo jangalon se nikale hue gharib parind
jahan gae unhen maskan mila uqabon ka
har ek puchhta phirta hai phir na kuchh tabir
ki jaise shahr mein mela tha raat KHwabon ka
main jo bhi kuchh hun ye sachchai meri apni hai
tamam jhuT tha likkha hua kitabon ka
Ghazal
Main phul phul safar kar rahi thi KHwabon ka
Ishrat Afreen